Reperi Silento dënohet me 30 vjet burg për vrasjen e kushëririt të tij

Muzikë | 12.06.2025 Ora 9:51

Reperi nga Atlanta, i njohur për këngën hit të vitit 2015 “Watch Me (Whip/Nae Nae)”, Silento, u dënua me 30 vjet burg për vrasjen e kushëririt të tij në vitin 2021.

Ricky Lamar Hawk, emri i tij i vërtetë, pranoi fajësinë për vrasje të shkallës së dytë, sulm të rëndë, posedim arme dhe fshehje të një vdekjeje, duke thënë se ishte në gjendje të sëmurë mendore kur kryente krimet.

Prokuroria thotë se Silento qëlloi disa herë kushëririn Frederick Rooks në shkurt 2021 dhe u largua nga vendi i ngjarjes.

Në intervistat pas arrestimit, Silento pranoi vrasjen, ndërsa gëzhojat e gjetura në vendin e ngjarjes përputheshin me armën e tij. Një përfaqësues i Silento tha se ai vuante nga probleme të rënda mendore dhe u diagnostikua me çrregullim bipolar gjatë qëndrimit te tij te mëparshëm në burg.