Familja e dashur e trollëve Moomin, e krijuar nga shkrimtarja dhe artistja finlandeze Tove Jansson gjatë Luftës së Dytë Botërore, po merr trajtimin e saj të parë amerikan në formë filmi të animuar.

Sipas Variety, filmi do të shkruhet dhe drejtohet nga Rebecca Sugar, krijuesja e serialit të suksesshëm Steven Universe dhe bashkautore në disa episode të Adventure Time. Projekti do të realizohet në bashkëpunim midis Moomin Characters dhe Annapurna Animation, studio që vitin e kaluar publikoi filmin e animuar Nimona.

Shefi ekzekutiv i Moomin Characters, Roleff Kråkström, ka theksuar se është i entuziazmuar për këtë bashkëpunim, duke theksuar se “Rebecca Sugar dhe ekipi i Annapurna do të sjellin një përkthim të ri, kreativ dhe të ndjerë të botës së Moomin-ve për brezat e vjetër dhe të rinj.”

Moomin-at, të cilët për herë të parë u prezantuan në librin The Moomins and the Great Flood në vitin 1945, janë bërë pjesë e kulturës botërore përmes nëntë romaneve, pesë librave ilustrativë dhe një serie komikësh të botuar në 40 vende. Seriali më i fundit Moominvalley u realizua në bashkëprodhim finlandezo-britanik, me zëra si Rosamund Pike dhe Taron Egerton.

Edhe pse data e publikimit nuk është përcaktuar, projekti i ri pritet të sjellë një stil të ngrohtë dhe artistik – ndoshta të frymëzuar nga animacionet klasike të dorës, për të ruajtur shpirtin origjinal të Jansson. Me prirjen e fundit të Akademisë për të vlerësuar filma të animuar jashtë shtëpisë Disney, Moomin-at mund të jenë kandidatët e ardhshëm për një çmim Oscar.