Kosova ka importuar mbi 50 milionë euro mish gjedhi dhe pule nga Brazili vetëm gjatë shtatë muajve të parë të vitit 2026, duke e bërë këtë shtet furnizuesin kryesor të vendit me këto produkte.

Nga 3 shtatori 2026, Bashkimi Evropian do të vendosë kufizime për disa eksporte braziliane me origjinë shtazore, për shkak të rregullave lidhur me përdorimin e antimikrobikëve te kafshët që hyjnë në zinxhirin ushqimor.

Sipas të dhënave të Doganës së Kosovës, nga janari deri në korrik, importet e mishit të gjedhit dhe pulës nga Brazili kanë kaluar 50 milionë euro. Në të njëjtën periudhë, importet e këtyre produkteve nga të gjitha shtetet e tjera së bashku kanë arritur në mbi 65 milionë euro.

Deri më tani, Kosova nuk ka njoftuar për masa të ngjashme me ato të BE-së, ndërsa Shqipëria ka paralajmëruar zbatimin e masave nga e njëjta datë.

BE-ja kërkon që kafshët dhe produktet me origjinë shtazore të importuara të mos vijnë nga kafshë të trajtuara me antimikrobikë për nxitjen e rritjes apo rritjen e prodhimit. Sipas Komisionit Evropian, Brazili nuk ka ofruar garancitë e nevojshme për respektimin e këtyre kërkesave gjatë gjithë ciklit jetësor të kafshëve.