Kina po përshpejton investimet në inteligjencën artificiale dhe robotikë, me synimin për ta kthyer vendin në një lider global të teknologjisë.

Më shumë se 2 milionë robotë tashmë punojnë në fabrikat kineze, më shumë se në çdo shtet tjetër. Mbi gjysma e robotëve industrialë në botë prodhohen në Kinë.

Në fabrikat e vendit, robotët përdoren për saldim, lyerje, ngritje dhe montim, ndërsa disa po zhvillohen për të kryer edhe detyra më të avancuara. Në të njëjtën kohë, shkollat profesionale po trajnojnë një gjeneratë të re studentësh në programim, inteligjencë artificiale dhe robotikë.

Kjo teknologji shihet si një mënyrë për të përballuar plakjen e popullsisë dhe mungesën e ardhshme të punëtorëve. Megjithatë, automatizimi ngre edhe shqetësime për vendet e punës. Rreth 120 milionë persona ende punojnë në sektorin e prodhimit në Kinë.

Kina po investon rreth 20 miliardë dollarë në këtë transformim, ndërsa gara teknologjike me SHBA-në po fokusohet gjithnjë e më shumë në atë se kush do të jetë në gjendje ta vendosë inteligjencën artificiale në miliona makina.